Ses karre is die afgelope week in Hartbeespoort gesteel, waarvan vyf in die Schoemansville-gebied gebuit is.
‘n Toyota Etios is verlede Woensdag ongeveer 15:00 by Sediba Plaza gesteel. Vrydag is kardiewe ook met ‘n Toyota Etios by Village Mall weg. Saterdag is altesaam vier voertuie gesteel. ‘n Nissan NP200 is tydens Laerskool Generaal Hendrik Schoeman se sportdag in Malanstraat gesteel en ‘n Toyota Etios in die Hoërskool Hartbeespoort se parkeerarea. Nog ‘n Toyota Etios is voor ‘n restaurant in Scottstraat gesteel en ‘n Toyota Fortuner voor ‘n huis in Waterfrontstraat.
“Motoriste word gewaarsku om paraat te wees, in veilige areas te parkeer, en wanneer hulle byvoorbeeld in die straat voor ‘n restaurant parkeer, om ‘n oog op hul voertuig te hou,” het Romano van der Spuy, woordvoerder vir die Hartbeespoort gemeenskapspolisiëringsforum, gesê.