Hartbeespoort se bekende voet-en-mondskilder, Lezelda Lubbe (54), is aangewys as een van die 50 finaliste vir vanjaar se Inspirasievrou van die Jaar.

Lezelda Lubbe

Die toekenning word jaarliks gemaak aan Suid-Afrika se mees inspirerende vroue – vroue wie se omgee jou lewe en dié rondom jou verander.
Lezelda is deur ‘n lid van die Hartbeespoort-gemeenskap genomineer en as een van die 50 finaliste gekies. “Ek het nie eers geweet van die kompetisie nie. Dit was ‘n groot verrassing,” sê sy.
Lezelda is met die rare siekte, ‘Phocomelia’, gebore. Sy het geen arms nie en onderontwikkelde bene sonder knieë, maar haar gebrek het haar nooit gestuit nie. Dié besondere vrou het na skool besluit om kuns haar lewe en inkomste te maak, en haar deursettingsvermoë en positiewe lewensuitkyk het gesorg vir haar reputasie as een van Suid-Afrika se suksesvolle mond-en-voetskilders. “Ek het met my gebrek grootgeword, so dit was nie iets waaraan ek gewoond moes raak nie. Ek gebruik my voete soos wat ander mense hulle hande gebruik. Ek is na die Hope-skool vir liggaamlik gestremdes waar ek die gewone matriek geskryf het. My ouers het my baie selfstandig grootgemaak en geleer om dinge self te doen. Na skool het ek egter besef ek sal nooit ‘n gewone loopbaan kan volg nie. Ek kan nie bestuur nie, hoe gaan ek by die werk kom? Wie gaan my help as ek moet badkamer toe? Daar was baie faktore en ek moes iets kry wat ek van die huis af kon doen.”
Lezelda het van die Suid-Afrikaanse Vereniging van Mond-en Voetskilders gehoor en ‘n nuwe wêreld het vir haar oopgegaan. “Ek het nooit aan kuns gedink nie. Ek het by hulle aangesluit en begin skilder. Ek was nie baie goed in die begin nie,” lag sy. “Maar ek het deurgedruk en sedertdien maak ek ‘n goeie bestaan uit my kuns en ek geniet dit.” Sy gebruik ook haar tone om ‘n skildery se agtergrond te skilder en haar mond vir die fyner werk. Haar kwasse word verleng, “want anders trek jou oë skeel!”
Sy stal gereeld uit en doen demonstrasies wat toeskouers verstom. Sy besoek ook skole en raak in die gemeenskap betrokke waar sy kan.
“Maar ek gaan egter steeds vir kunsklasse, ek bly ‘n student. Ek leer steeds.”
Sy lewe andersins ‘n vol lewe. “Ek is baie behendig met my tone. Ek werk op die rekenaar en foon. Ek kan selfs ‘n knoop met my tone aanwerk,” skerts sy. “Ek doen ook tapisseriewerk, eet met my tone en borsel my tande… dit is my hande.” En as sy wil inkopies doen, spring sy op haar elektriese rystoel en vat die pad Village Mall toe. “Ek het ‘n rugsak en by die winkels is almal baie behulpsaam.”
Lezelda is ook passievol om produkte van die mond-en voetskilders te bemark. Kunswerke van skilders word op allerlei huishoudelik artikels soos kussingslope, tafellappe, handdoeke en vatlappe gedruk en verkoop. “Ek is geseënd en dankbaar indien ek ander kan inspireer.”
Die Hartbeespoort-gemeenskap kan help om Lezelda op die wenpad te plaas. Stem so vir Lezelda: SMS ‘INSPIRASIE 26’ na 33282. Sluitinsdatum is 31 Augustus 2025.